The Latest

அமாவாசை, கேட்டை, மூல நட்சத்திர நாட்களிலும், புதன், வியாழன், சனிக்கிழமை நாட்களிலும் ஆஞ்சநேயரை வழிபடலாம்.

ஆஞ்சநேயரை வழிபட ராகுகாலம், எமகண்டம், அஷ்டமி, நவமி எனப் பார்க்க வேண்டியதில்லை... எந்த நேரத்திலும் அவரை வணங்கலாம்.

ஆஞ்சநேயருக்கு மிகவும் பிடித்தது வெற்றிலைமாலை, வடை மாலை, துளசி மாலை ஆகியவை ஆகும்.

மார்கழி மாதம் மூல நட்சத்திரம் ஆஞ்சநேயரின் ஜெயந்தி நாளாகும். அன்று அவருக்குப் பூஜை செய்வது சிறப்பாகும்.

ஆஞ்சநேயர் பாதத்தில் குங்கும அர்ச்சனை செய்தால் கோடி நன்மை கிடைக்கும்.

அனுமனின் வாலில் நவக்கிரகங்கள் இருப்பதாக ஐதீகம். எனவே, அனுமனை வழிபட்டால் நவக்கிரகப் பாதிப்பு ஏற்படாது என்பது நம்பிக்கை.

எந்த கோயிலுக்குச் சென்றாலும், கடவுளின் எந்த மூர்த்தங்களைப் பார்த்தாலும், அத்தெய்வ வடிவத்தின் முகத்தைப் பார்க்ககூடாது. திருவடிகளைக் கண்டுதான் வணங்க வேண்டும். ' திருவடி' என்பது பாதங்கள் பொற்பாதங்கள், கமல பாதங்கள் என்று பொருள்படும். திருவடி நகர்ந்தால்தான் பரமனின் திருவுருவம் நகரும். இப்படிப்பட்ட திருவடிகளாக விளங்குபவரே குருநாதர்.

முப்பது முக்கோடி தேவர்களாலும் கொடுக்க முடியாத பேரருளைக் கொடுக்க வல்லது குருநாதரின் திருவடி. குருவாய் உருவாய் உளதாய் இலதாய் அல்லதுமாய் எல்லாமாய் இருக்கக்கூடிய பரம்பொருளின் திருவருளைப் பெறுவதற்கும், அது மேலும் பெருகுவதற்கு அவனுடைய திருவடிகளை சரணம் அடைவதைவிட வேறு மார்க்கம் கிடையாது.

ஆண்டவனிடம் முழுமையாக நம்மை அர்ப்பணித்துக் கொள்ளும் முறையே 'அஷ்டாங்க நமஸ்காரம்' ஆகும். இந்த நமஸ்காரம் செய்பவர்கள் மனைவி, மக்கள், உற்றார் உறவினர்கள், செல்வம், நம்மைச் சார்ந்துள்ள கால்நடைகள் அத்தனையையும் மறந்துவிட்டு, சுயநல பிரார்த்தனை எதுவும் மனதில் இல்லாமல் பூரணமாக பகவானிடம்  தன்னை அர்ப்பணித்துவிட வேண்டும்.

முதலில் தலையை தரையில் வைத்து, மார்பு பூமியில் படும்படி வலக்கையை முன்னும், இடக்கையை பின்னும் நேரே நீட்டி, பின்னர் அதே முறையில் மடக்கி, வலத்தோளும், இடத்தோளும் தரையில் பொருந்தும்படி கைகளை இடுப்பை நோக்கி நீட்டி  வலக்காதை முதலிலும், இடகாதை பிறகும் பூமியில் படும்படி செய்ய வேண்டும். இந்த நமஸ்காரத்தை 3, 5, 7 என ஒற்றைப்படை எண்களில் எத்தனை முறை வேண்டுமானாலும் செய்யலாம். கொடிமரத்தின் அருகே தான் இந்த நமஸ்காரத்தை செய்ய வேண்டும்.

ஆடி மாதம் முழுவதும் அம்மனை விதவிதமாக அலங்காரம் செய்து வழிபடுவார்கள். குறிப்பாக ஆடிப்பூரத் தினத்தன்று அம்மனுக்கு வளையல் அணிவித்து செய்யப்படும் வழிபாடு சிறப்பானது. தமிழ்நாடு முழுவதும் வளையல் வழிபாடு ஆண்டுக்கு ஆண்டு அதிகரித்துக்கொண்டே வருகிறது. திருமணத் தடையுள்ள கன்னிப்பெண்களும், குழந்தை செல்வம் கேட்டு அம்பாளின் அருளைப் பெறுவதற்கு பிரார்த்திக்கும் பெண்களும் இந்த வளையல் சாற்றும் நிகழ்ச்சியில் கலந்து கொண்டு அம்மனின் அருளைப் பெறுவர்.

மதுரை மீனாட்சியம்மன் கோவிலில் ஆடிப்பூரத் திருவிழா முளைக்கட்டு விழாவாக ஆண்டுதோறும் கொண்டாடப்பட்டு வருகிறது. இதேபோல் திருவண்ணாமலை அருணாச்சலேஸ்வரர் கோவிலில் வீற்றிருக்கும் அம்மனுக்கும் வளைகாப்பு விழா விமர்சியாக கொண்டாடப்பட்டு வருகிறது. இத்திருநாளில் பெண்கள் விரதமிருந்து அம்மனுக்கு வளையல் சாற்றி அதை திரும்ப அணிந்து கொண்டால் அவர்களை பிடித்திருக்கும் தோஷமெல்லாம் நிவர்த்தியாகி அவர்கள் வாழ்வில் மங்களம் பெருகும்.

 

திருநெல்வேலி நெல்லையப்பர்-காந்திமதி அம்பாள் கோவிலில் ஆண்டு தோறும் ஆவணி மாதத்தில்  நடைபெறும் ஆவணி மூலத்திருவிழா நேற்று கொடியேற்றத்துடன் தொடங்கியது.தொடர்ந்து நேற்று அதிகாலை சுவாமி, அம்பாளுக்கு அபிஷேகம், அலங்கார பூஜை நடைபெற்றது. அதை தொடர்ந்து காலை 11 மணிக்கு சுவாமி சன்னதியில் உள்ள கொடி மரத்தில் கொடி ஏற்றப்பட்டது. அப்போது அங்கு திரண்டிருந்த பக்தர்கள் பக்தி கோஷம் எழுப்பினர். இந்த திருவிழா மொத்தம் 11 நாட்கள் நடைபெறுவிருக்கிறது

தொடர்ந்து நாளை இரவு 8 மணிக்கு சுவாமி, அம்பாள் வெள்ளி ரிஷப வாகனத்திலும், விநாயகர் வெள்ளி மூஞ்சூறு வாகனத்திலும், சுப்பிரமணியர் மர மயில் வாகனத்திலும், சண்டிகேசுவரர் சப்பரத்திலும், பஞ்ச மூர்த்திகளுடன் 4 ரதவீதிகளிலும் உலா வந்து பக்தர்களுக்கு அருள்பாலிக்கின்றனர். இத்திருவிழா நாட்களில் சுவாமி-அம்பாளுக்கு அபிஷேக ஆராதனைகள் நடைபெறுகிறது. இந்த புனித நிகழ்ச்சியில் கலந்து கொள்ள எண்ணற்ற பக்தர்கள் இத்திருத்தலத்திற்கு வந்த வண்ணமுள்ளனர்.

கோயிலில் திருமணம் செய்து கொள்வதால் கூடுதல் நற்பலன்கள் கிடைக்கும் என கூறப்படுகிறது. இது உண்மை தான். பொதுவாகவே வழிபாட்டுத் தலங்களில் சுபகாரியங்களை வைத்துக் கொள்வது நல்லது. அதுவும் வாழ்க்கைத் துணையை ஆலயத்தில் ஏற்றுக் கொள்வதே சாலச் சிறந்தது. அதற்காகத்தான் பண்டைய காலங்களில் கோயில்களை எழுப்பிய மன்னர்கள் பல நூற்றுக்கணக்கானோர் அமரும் வகையில் ஆயிரம்கால் மண்டபங்களையும் கட்டி வைத்தனர்.

மன்னர் காலத்தில் கணவன்-மனைவி பிரிவு என்பது மிகவும் அபூர்வமான நிகழ்வாக இருந்தது. தலைமுறைகள் மாற்றத்தினால் பிரிவு அதிகரித்துள்ளது என்று சிலர் கூறினாலும், அந்தக் காலத்தில் இறைவனை சாட்சியாகக் கொண்டு வாழ்க்கைத் துணை ஏற்றுக் கொண்டவர்கள், பிரிவதற்கு யோசிப்பர். அதற்கு காரணம் இறைவன் மீதுள்ள பக்தி, பயம்.

மேலும், கோயிலில் வழிபாட்டுத் தலங்களில் எப்போதும் மந்திரங்கள் ஜபித்தல், ஸ்லோகங்கள் ஓதுதல், இறைவனைப் பற்றிய பாடல்கள், தெய்வீக நடவடிக்கைகள் மட்டுமே மேற்கொள்ளப்படுவதால் எப்போதும் நேர்மறைக் கதிர்கள் அங்கு இருக்கும். எனவே அங்கு மாங்கல்யம் சூட்டிக் கொள்வது சிறப்பான பலன்களைத் தரும்.

ஸ்ரீ திருமலை திருப்பதி திருக்கோயில் மகா கும்பாபிஷேகத்தை முன்னிட்டு திருப்பதி திருமலைக்கு மலர்கள் தொடுத்து அனுப்பும் பணி ஸ்ரீ திருமலை திருப்பதி ஸ்ரீமன் நாராயணா நித்ய புஷ்ப கைங்கரிய சாபா சார்பில் திருச்செங்கோட்டில் நடைபெற்றது.

திருமலை வெங்கடாஜலபதி கோவிலில், வரும், 15ல் கும்பாபிஷேகம் நடக்கவுள்ளது. இதற்காக, நாமக்கல் மாவட்டம், திருச்செங்கோட்டில், திருமலை திருப்பதி ஸ்ரீமன் நாராயண நித்திய புஷ்ப கைங்கர்ய சபா டிரஸ்ட் மூலம், ஆறு டன் பூக்களை, மாலைகளாக தொடுக்கும் நிகழ்ச்சி நடந்தது.

துளசி, ரோஜா,மல்லிகை,மருவு,சாமந்தி,தாமரை,அரளி போன்ற 6 டன் மலர்களை தொடுக்கும் பணியை சபாவின் சடகோப ராமானுஜதாச சந்திரசேகரன், கனகராஜ்,பெரியசாமி,வெங்கடேசன் ஆகியோர் பூஜை செய்து துவக்கி வைத்தனர். 500-க்கும் மேற்பட்ட பெண்களும்,பக்தர்களும் மலர் தொடுக்கும் பணியில் ஈடுபட்டனர். அதிகாலை தொடங்கி மாலை வரை மலர்கள் தொடுக்கப்பட்டு சிறப்பு பூஜைகள் நடத்தப்பட்டு லாரிகள் மூலம் திருமலைக்கு மலர்கள் அனுப்பப்பட்டன.

தனம், தான்யம் அருளும் மகாலட்சுமி 15 இடங்களில் தங்கியிருப்பதாகப் புராண நூல்கள் குறிப்பிடுகின்றன அவை

1 யானையின் முகம்

2 பசுவின் பின்புறம்

3 வாசனை உள்ள வெள்ளை மலர்கள்

4 விளக்கு

5 சந்தனம்

6 தாம்பூலம்

7 கோமியம்

8 கன்னிப்பெண்கள்

9 அதிகம் பேசாதவர்கள்

10 வேதம் ஓதிய சான்றோர்கள்

11 உள்ளங்கை

12 குதிரை

13 டமாரம்

14 பசு மாட்டின் கால் தூசி

15 வேள்விப்புகை

மஞ்சள், குங்குமம், திருமண், சூர்ணம், எலுமிச்சை, துளசி, மாக்கோலம், மாவிலைத் தோரணம், உருவத்தை பிரதிபலிக்கும் கண்ணாடி, பூரண கும்பம், வில்வ இலை, நெல்லிக்கனி, செவ்வந்திப்பூ, இவையாவும் மகாலட்சுமிக்கு பிடித்தமான மங்கலப் பொருட்களாகும்.

மனிதர்கள் தெரிந்தும் தெரியாமல் செய்யும் தவறுகளை நீறச் செய்து வாழ்வின் உயர் நிலை அடைய செய்வதால் திருநீறு என்று அழைக்கப்படுகிறது. சிவபெருமானின் அருட்சின்னமாகக் கருதப்படும் திருநீர் எல்லா நலன்களையும் வழங்கக் கூடியது. இது சிவனடியார்களால் அணிந்து கொள்ளப்படும் புனிதப்பொருளாகும்.

அத்தகைய சிறப்புவாய்ந்த தீருநீறு நான்கு வகைப்படுகிறது அவை கல்பம், அனுகல்பம், உபகல்பம், அகல்பம்

கல்பம் - நோயின்றி ஆரோக்கியத்துடன், கன்றுக் குட்டியுடன் உள்ள தூய பசுவின் சாணத்தை தாமரை இலையில் தாங்கி எடுத்து, அதனை பஞ்சு, பிரம்ம மந்திரங்கள் ஓத அக்னியில் இட்டு எரிப்பதன் மூலம் கிடைப்பது

அனுகல்பம் - தோட்டம் காடுகளில் மேயும் பசுக்களின் சாணத்தை அக்னியில் எரிப்பதன் மூலம் கிடைப்பது.

உபகல்பம் -  பசுக்கள் தங்கியிருக்கும் இடம் மற்றும் தொழுவத்திலிருந்து எடுக்கப்பட்டசாணத்தை அக்னியில் எரித்து, அதன் மூலமாகக் கிடைப்பது

அகல்பம் - பல பசுக்களின் சாணத்தை ஒன்றாக்கி முறையாக மந்திரங்கள் ஓதாமல் நெருப்பில் எரித்து கிடைப்பது.

துளசியை தனித்தனி இலையாகப் பறிக்கக்கூடாது துளசியைக் கதிரோடு பறிக்க வேண்டும். நான்கு இதழ்களோடும், நடுவில் தளிரும் உள்ளதாகவும், அல்லது ஆறு இதழ்கள் உள்ளதாகவும் பறிக்க வேண்டும். துளசி இலை கிடைக்காவிட்டால் துளசித்தண்டை பறித்துக் கொள்ளலாம். அதுவும் இல்லாவிட்டால் துளசி வேர், வேரும் இல்லாவிட்டால் துளசி நட்டிருந்த மண்ணை எடுத்து சுவாமியின் பாதத்தில் வைக்கலாம். மண்ணும் கிடைக்காவிட்டால் துளசி என மனதார உச்சரித்தாலே போதும். துளசி இலை வைத்து பூஜிப்பதன் பலனை அடையலாம். அத்தகைய சிறப்பு துளசி இலைக்கு உள்ளது.

Page 1 of 80